(攝影：馬建華)
近年香港發生大大小小嘅事，都喚起一班年青一輩關心政治同香港問題，嚟緊九月就係立法會選舉，一眾歌手黃山怡（糖妹）、雷琛瑜（J.Arie）、SupperMoment同新青年理髮廳，今日就去到九龍公園參與港台呼籲登記做選民嘅活動。
糖妹同J.Arie同樣都係十八歲就登記做選民，佢哋都唔係聽人講邊個好就投邊個，而係真正去留意候選人政網先投票，住喺深水埗區嘅糖妹特別關心區內老人同殘障人仕問題，所以會投一啲關心呢方面問題嘅議員，而J.Arie就明知跟家人政治立場唔同，所以喺飯桌上都唔會講相關問題免得起爭拗。
講到黃翠如爸爸公司上市，近日同翠如拍劇嘅糖妹話：「噚晚先同佢食宵夜，都未知，若果係配股畀我哋就好喇。」糖妹笑言唔會嬲翠如無事前通知，因為若果翠如事前不停同人講自己爸爸公司上市反而好奇怪，但佢就覺得黃爸爸奮鬥故事非常勵志。至於有指陳豪同胡定欣拍外景時不停NG，未知是否因ViuTV開台感壓力要提升質數，有份演該劇嘅糖妹指自己只係拍第二部長劇，而演員想拍到最佳效果而要求再拍係好事，佢指劇組一向認真同之前無乜太大分別。
資料來源：《蘋果日報》
由於《蘋果日報》網站於2021年6月24日00:00停止運作，我們已趕於網站關閉前下載所有有關J.Arie的報導，大部份報導上傳至本網站以供各位J Fans翻查。
121 total views, 2 views today